சீனாவைச் சேர்ந்த 27 வயது இளைஞர் ஜாங். இவர் 2000 கிலோ மீட்டர் தூரம் பயணம் செய்து 71 மீட்டர் உயம் உள்ள லேஷான் ராட்சத புத்தரை அடைந்தார்.

அப்போது ஏர்பட் டிசைனில் உருவாக்கப்பட்ட ஸ்பீக்கரை கொண்டு சென்ற அந்த இளைஞர், புத்தரின் காதில் அந்த ஸ்பிக்கரை வைத்து அந்த பகுதியே அதிரும் அளவுக்கு தனது ஆசைகள் அனைத்தையும் புத்தரிடம் கேட்டுள்ளார்.

தனது ஆசைகள் புத்தருக்கு கேட்க வேண்டும் என்பதற்கான புத்தரின் காதில் ஸ்பீக்கரை வைத்து ஸ்பீக்கரின் சத்தத்தை உச்ச அளவுக்கு கூட்டியுள்ளார் அந்த இளைஞர். தொடர்ந்து பேசிய அவர், மாபெரும் புத்தரே உனக்கு தெரியுமா? எனக்கு 27 வயது ஆகிறது. ஆனால் என்னிடம் கார் இல்லை. எனக்கு வீடு இல்லை. எனக்கு காதலியும் இல்லை என உக்கிரமாக கத்துகிறார்.

தொடர்ந்து பேசும் அந்த இளைஞர், தனது ஆசைகள் அனைத்தையும் ஒவ்வொன்றாக பட்டியலிடுகிறார். அதாவது, முதலில், நான் பணக்காரனாக விரும்புகிறேன். எனக்கு அதிகம் தேவையில்லை. 10 மில்லியன் யுவான் போதும். (10 மில்லியன் யுவான் என்பது இந்திய ரூபாய் மதிப்பில் 11.81 கோடி ரூபாய்) மிக முக்கியமாக, எனக்கு கொஞ்சம் அழகான, மென்மையான ஒரு காதலி வேண்டும். என் 10 மில்லியனை விட என்னை அதிகம் நேசிக்க வேண்டும், என கூறுகிறார் அந்த இளைஞரான ஜாங்.

ஜாங்கின் இந்த வித்தியாசமான வேண்டுதல் சீன ஊடகங்களை ஆக்கிரமித்துள்ளது.

"மெர்குரி ரெட்ரோகிரேட்" விளைவாக ஏற்பட்ட துரதிர்ஷ்டத்தைத் தொடர்ந்து, சீனாவின் கிழக்கு ஜெஜியாங் மாகாணத்திலிருந்து தென்மேற்கு சிச்சுவான் வரை, பெரிய புத்தரை காண வார இறுதியில் 12 மணிநேரம் பயணம் செய்ய முடிவு செய்ததாக தெரிவித்துள்ளார் ஜாங்.

ஜாங்கின் இந்த வீடியோவை பார்த்த நெட்டிசன்கள், நிச்சயம் புத்தர் உங்களின் ஆசைகளை நிறைவேற்றுவார் என்றும், உங்கள் நம்பிக்கை பலிக்கட்டும் என்றும் கமெண்டுகளை பொழிந்து வருகின்றனர்.

மேலும் பலர் உங்களையும் நம்பாமல் மற்றவர்களையும் நம்பாமல் புத்தரை நம்பி இருக்கிறீர்களே என்றும் கமெண்டுகளை பதிவிட்டுள்ளனர்.