நடிகர் மற்றும் இயக்குனர் மனோபாலாவின் திடீர் மரணம் திரையுலகில் சோகத்தை ஏற்படுத்தியுள்ளது.

கோலிவுட்டின் சீனியர் இயக்குநராகவும் நடிகராகவும் வலம் வந்த மனோபாலாவின் திரைப் பயணம் பற்றி இங்கே பார்க்கலாம்.

நாகர்கோவில் மருங்கூர் பகுதியை பூர்வீகமாகக் கொண்டவர் மனோபாலா.

இவர் பாரதிராஜாவிடம் உதவி இயக்குநராக பணி புரிந்தார். 1979ம் ஆண்டு பாக்யராஜை ஹீரோவாக வைத்து பாரதிராஜா இயக்கிய புதிய வார்ப்புகள் திரைப்படத்தில் தான் மனோபாலாவின் சினிமா பயணம் தொடங்கியது.

புதிய வார்ப்புகள் படத்தில் பஞ்சாயத்து மெம்பராக ஒரு சின்ன கேரக்டரிலும் நடித்திருந்தார்.

இதனையடுத்து நிறம் மாறாத பூக்கள், கல்லுக்குள் ஈரம், டிக் டிக் டிக், கோபுரங்கள் சாய்வதில்லை என பல படங்களிலும் நடிகராக அசத்தினார்.

அதேநேரம் தனது இயக்குநர் கனவையும் விடாமல் துரத்திய மனோபாலா, 1982ல் ஆகாய கங்கை படத்தை இயக்கினார். கார்த்திக், சுஹாசினி நடிப்பில் வெளியான இந்தப் படம், மனோபாலாவை நல்ல இயக்குநராகவும் அறிமுகப்படுத்தியது. இதனால், அடுத்தடுத்து நான் உங்கள் ரசிகன், பிள்ளை நிலா, சிறை பறவை, தூரத்துப் பச்சை என படங்கள் இயக்கினார்.

1980களின் இறுதியில் சூப்பர் ஸ்டாராக ரஜினியையும் இயக்கினார் மனோபாலா. அதன்படி ரஜினிகாந்த், ராதிகா, பாண்டியன், ரகுவரன், மலேசியா வாசுதேவன் என பலரும் நடித்த ஊர்க்காவலன் படத்தை இயக்கினார். இந்தப் படம் ரஜினிக்கு மாஸ் ஹீரோ அடையாளத்தைக் கொடுத்தது.

இதனையடுத்து என் புருஷன்தான் எனக்கு மட்டும்தான், மூன்றெழுத்தில் என் மூச்சிருக்கும் என விஜயகாந்துக்கு அடுத்தடுத்து இரண்டு ஹிட் படங்களை கொடுத்தார். ரஜினி, விஜயகாந்த் என நின்றுவிடாமல் சத்யராஜ், பிரபு போன்ற முன்னணி நடிகர்களுக்கும் ஹிட் கொடுத்தார்.

மனோபாலா இதுவரை மொத்தம் 40 திரைப்படங்கள் இயக்கியுள்ளதாக கோலிவுட் வட்டாரங்கள் தெரிவிக்கின்றன. அதேபோல், 16 சீரியல்களையும் இயக்கியுள்ளார். ஆக்‌ஷன், காமெடி, குடும்ப சென்டிமெண்ட் என எல்லா ஏரியாக்களிலும் படங்களை இயக்கி கோலிவுட்டின் முன்னணி இயக்குநராக வலம் வந்தவர் மனோபாலா. மிக முக்கியமாக மனோபாலா திரைக்கதை எழுதுவதில் வித்தகர் என்பது பலரும் அறியாத உண்மை.

ஒருகட்டத்தில் முழுநேர நடிகனாக மாறியதும், காமெடி கேரக்டர்களில் நடித்து ரசிகர்களை சிரிக்க வைத்தார். விவேக், வடிவேலு, சந்தானம் என டாப் காமெடி ஸ்டார்களுடன் இவர் அடித்த காமெடி லூட்டிகள் கொஞ்சம்நஞ்சம் அல்ல. அதேபோல், சதுரங்க வேட்டை திரைப்படம் மூலம் தயாரிப்பாளராகவும் அறிமுகமானார் மனோபாலா.

இந்நிலையில் நடிகர், இயக்குநர், தயாரிப்பாளர் என நின்றுவிடாமல் பல முன்னணி இயக்குநர்களுடன் ஸ்க்ரிப்ட் எழுதுவதிலும் அதிக ஆர்வம் கொண்டவராம். பல இளம் இயக்குநர்களுக்கு மனோபாலா ஒரு குருவாக இருந்து வழிகாட்டியுள்ளார்.

மேலும், பல அரிய சினிமா தகவல்களையும் விரல் நுனியில் வைத்திருப்பார் மனோபாலா. பார்ப்பதற்கு காமெடி நடிகராக இருந்தாலும் சினிமாவின் அனைத்துத் துறையில் அவர் ஒரு ஜீனியஸ் என்பது பலரும் அறியாதது.

தற்போது இவருடைய மறைவு தமிழ் திரையுலகிற்கு பேரிழப்பு தான் என்பதை மறுக்கவே முடியாது.